Thank you father!

انهارده عيد ميلاد والدي…
هو جه الأرض من ٩٧ سنه، و مشي من ١٢ …

بابا العزيز
شكرا ليك علي انك اخدت بالك مني …
شكرا ليك علي انك اخترت امي …
شكرا ليك علي انك علمتني كتير من أهم الدروس في حياتي …
حتي لو كانت فيه بيننا خلافات في وقت من الأوقات و انا صغير …
إنما أنا عارف و متأكد انك حبيتني بالطريقه اللي كنت شايفها صح … و علي قد ما قدرت … و ده كفايه بالنسبالي 🙏

اتمني أن تكون روحك سعيده و في سلام دلوقتي …
و ان دائما افتكرك بحب ❤️
#منير_الشاذلي
Today marks my father’s birthday …
97 years ago, he was born, and 12 years ago, he departed!

Dear father,
Thank you father, for taking care of me ….
For choosing my mother …
And for teaching me some of the most valuable things in life …
And even though we had some difficult times at some point …
I now know that you loved me in your own way, and to the best of your capacity … And that’s enough for me ❤️
May your spirit soar in eternal peace …
And may you always be remembered with love 🙏

#Monir_El_Shazly

استخدم عقلك!

احنا ممكن ما نقدرش نغيّر اللي بيحصل في الدنيا، زي الحاجات اللي بنمرّ بيها في حياتنا او القَدَر بتاعنا…  بس لما بنغيّر احنا بنشوف الحاجات دي ازاي، و احساسنا ناحيتها ايه، بنعرف  نتعامل معاها احسن …  و ممكن كمان نتعلّم منها !.
و ده في حد ذاته قوه كبيره جدا… لو عرفنا نستغلها.

قدرتنا علي إستخدام  عقلنا و السيطره عليه دي حاجه مهمه جدا، لأنها بتغير نظرتنا للحياه ككل……
إنما العقل لو اتساب براحته، ممكن “يسحلنا وراه”…
#منير_الشاذلي

“انت لا تملك التحكّم في ما يحدث خارجك، و لكنك تملك التحكم في ما يحدث داخلك (ردود أفعالك و نظرتك لما يحدث)” -#وين_داير

“You cannot always control what goes on outside. But you can always control what goes on inside.” #Wayne_Dyer

You may not be able to change what happens in the world around you now, or your fate… but you can change how you perceive it, feel about it, how you react to it… And what you could learn from it…
and that’s quite a great power to have!.

Use your mind, don’t let it use you!
#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual

I’m finally SOMEBODY !

من اكتر من ٢٥ سنه …قريت اعلان في مجله كان بيقول :
“طول حياتي كان نفسي ابقي “شخص مهم” …
دلوقتي انا بقيت “شخص مهم” …
بس مش انا (بس مش عارف نفسي) !!!”

“All my life, I wanted to be SOMEBODY …
Now I’m finally SOMEBODY…
But it isn’t me”…

دائما رأيي أن مش مهم الناس بتقول علي الواحد ايه… مش مهم انه يبقي الاحسن…او الاغني… او الاشهر …لأن كل ده مالوش لازمه..لو مش عارف و مستريح مع نفسه في المرايه.

الشهره…الفلوس…الاهميه… كلهم مالهومش لازمه… لو الواحد مش سعيد…و لو معندوش سلام مع نفسه…

#منير_الشاذلي
#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual

Photo credit: unknown

#السلام_النفسي
#سلام_نفسي
#innerpeace

Charity starts from home!

انت…قبل اي حد تاني، تستاهل انك تحب نفسك، تعاملها كويس و تحترمها و تتقبلها….
لأن لو ماعملتش كده، محدش تاني حيعاملك كويس أو حيحترمك!  #منير_الشاذلي 

“الاحسان… بيبتدي من البيت (من الإحسان للنفس) ” – #مهاريشي

“Charity starts from home” – #Maharishi

You (before anyone else) are worthy of your own #compassion, #love and #acceptance. #Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual

Image: unknown

ماتسامحش أهلك !

ماتسامِحش اهلك!

——

ناس كتير بتتكلم معايا عن الحاجات اللي بكتبها عن اهمية العلاقه بين الواحد و بين امه و ابوه ،و بيسألوني ازاي ممكن الواحد “يسامح اهله”، و ردّي دايما ان “مش المفروض ان الواحد يسامح اهله! “… طبعا الرد ده بيبقي صادم بالنسبه لناس كتير… بس ده رأيي.

لأن اصلا فكرة ان الواحد “يسامح اهله” فيها نوع من انواع التعالي علي الاهل.. و افتراض انك تعرف اكتر منهم و علشان كده ” حتكبّر دماغك و تسامحهم ، علشان ياعيني هما غلابه و مش فاهمين” …. نفس فكرة ان ابنك او بنتك يسامحوك علشان انت زعقتلهم علشان مايحطوش صوابعهم في كُبس الكهربا و هم صغيرين و هما حيسامحوك علشان انت اب او ام طيبه بس مجنون!   

امنا و ابونا جم الدنيا قبلينا  ب ٢٠ او ٣٠ سنه ( او يمكن اكتر)  و مرّوا بتجارب في حياتهم اكتر مننا ب ٢٠ او ٣٠ سنه،  ففكرة اني عارف اكتر منهم في الحياه علشان معايا دكتوراه او علشان سافرت شوية بلاد و هم لأ … أو حتي علشان اشتغلت في مناصب اعلي منهم هي فكرة فيها كتير من الايجو و الشعور بالافضليه الغير مبررة ….
الخبرات الحياتيه الاساسيه في الحياه هي خبرات الموت و الميلاد ..و شوية traumas في النص…و في الكلام ده دائما اهالينا سابقيننا بخطوه …حتي لو عمرهم ماكانوا سابوا القريه اللي هم جايين منها أو طلعوا بره البيت!.

احنا عمرنا ماحنعرف اللي امنا و ابونا مرّوا بيه في صُغرهم كله… و لا ايه اللي عانوه و هم بيربونا لغاية ما كبرنا…. و لو عرفنا.. حتي فكرة اننا نسامحهم حتبان علي انها فكره سخيفه و طفوليه جدا. 

الحقيقه اننا “مابنسامحش” ابونا و امنا.. .احنا “بنتقبلهم زي ما هم…و نتصالح معاهم”…  و نحترم اللي هم ادوهولنا (حتي لو كنا شايفين انه كان مش زي ما احنا عايزين) …. لأن غالبا ده كان اكتر حاجه  ممكن يدوها ( او الطريقه اللي يعرفوها)! 

ده مش معناه اننا نوافق علي تحكمهم في حياتنا (لو احنا كبار و هم لسه بيحاولوا يتحكموا في حياتنا )، أو نوافق علي اي اعتداء جسدي أو لفظي بيحصلّنا منهم ( علي الرغم من أن تعريف الاعتداء ده تعريف مطاط و مش محدد!). انما ده معناه اننا نحاول نفهم الأسلوب ده و الافعال دي جايه منين و ايه اسبابها (اللي غالبا ليها علاقه بطريقه تربيتهم هما) ، و نتعاطف معاهم و نفهم أن معظم أفعالهم جايه من موقع الحب لينا و أنهم كانوا عايزين يشوفونا احسن (حتي لو كان أسلوب التعبير عن الحب ده مش مناسب لينا)

#السلام النفسي في الحياه و مع الاهل ما بيجيش لما نفتكر اننا اكبر منهم… او عارفين اكتر منهم … السلام النفسي بييجي لما ناخد وضعنا الطبيعي قدامهم… لما نبطل ننتقد تصرفاتهم و الحاجات اللي هما ادوهالنا أو مادوهاش… لما نبطل نبقي عايزينهم مثاليين و مابيغلطوش…و نعرف انهم بشر و ممكن يغلطوا أو يعملوا تصرفات بحسن نيه و ماتطلعش مفيده لينا  …. و كمان لما نبطل نحس اننا *مسئولين عن اتخاذ قرارات ليهم* لما بيكبروا علشان يا عيني هما مش فاهمين الحياه دلوقتي عامله ازاي !

لما نعرف اننا “احنا الصغّير..   و هم الكبار”

السلام النفسي بييجي لما قلبنا يكون مفتوح لابونا و امنا!
  
#منير_الشاذلي

#Monir_El_Shazly
( إعادة نشر)

#السلام_النفسي
#العلاقه_مع_الاهل

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual

اسئله محتاج تسألها لنفسك!

أسئلة محتاج تسألها لنفسك!
_______

كتير في شغلي … او حتي لما بتكلم في جلسات او ندوات ..دايما بقول ان الشخص محتاج يبص جواه…قبل ما يبص براه ( و طبعا ده مش كلامي انا..ده كلام اتقال من الاف السنين من تقريبا كل المعلمين الروحانيين و الرُسُل في كل الديانات:) )

بس دايما معظم الناس اسهل عندهم انهم يبصوا بره، و ينتقدوا #الحياه و اللي بيحصل فيها … و ينتقدوا الناس التانيه … و مابيسألوش نفسهم اسئله ممكن تبان بديهيه …اسئله ليها علاقه مباشره بيهم و بحياتهم!

و علشان كده..دايما بأعمل لسته فيها اسئله للناس لما بأبتدي اشتغل معاهم ، الاسئله دي محتاجيين يجاوبوها علشان يعرفوا نفسهم شويه , و يبتدوا ينقلوا تفكيرهم من بره…لجوه…علشان “ما فيش حاجه بتتغير في الحياه…الا لو اللي جوه اتغير.”..

لو عايز تغير حياتك (او حتي المكان او العلاقه اللي انت فيها)…دي اسئله ممكن تساعدك

• انت عايز ايه من الحياة؟
٠ ايه هو مفهوم #النجاح من وجهة نظرك؟ ( هل المفهوم ده اتغير مع الوقت؟)
• انت حاسس انك ناجح؟
• طيب ايه اللي ممكن يخليك تحس انك ناجح؟ 
• لو انت عارف انك مش ممكن تفشل في اي حاجه حتختار تعملها …حتعمل ايه؟
• هل انت راضي عن نفسك؟
• طيب….لو مش راضي، ايه اللي ممكن يخليك ترضي عنها؟
• ايه هي نقط قوتك الرئيسية؟
• لو انت استغليت نفط القوه دي في حاجه (او شغلانه) حتبقي ايه هي ؟
• ايه هي الحاجات اللي فيك و حاسس انك محتاج تغيرها؟
• هل انت حاسس ان وجودك مؤثر او مفيد للناس اللي حواليك؟؟
• طيب…ايه الحاجه او السلوك اللي بتعمله، و بيأثر في الناس ؟( بشكل إيجابي ..او بشكل سلبي)
• ايه الفرق بينك دلوقتي… و بينك من سنه فاتت؟
. ايه الحاجه اللي نفسك (او كان نفسك) تقولها لأبوك أو امك و ماقولتهاش لغاية دلوقتي ؟
• ايه السؤال اللي محتاج تسأله لنفسك دلوقتي؟؟
• طيب…ايه حتكون اجابة السؤال ده لو سألته؟

• اخر حاجه…هل انت سعيد في حياتك ؟؟؟ … و لو الجابه لأ ..ايه اللي ممكن تعمله علشان تبقي اكتر #سعاده؟؟

لو فيه اسئله كتيره هنا مش لاقيلها اجابه، يبقي انا محتاج ابص جوه نفسي اكتر!..
و لو اجابات كتيره، مش مستريح ليها، يبقي يمكن محتاج اخد خطوات لتغيير حياتي ابتداء من دلوقتي ! ( مش اندم علي اللي حصل أو اللي محصلش)

حياتك ..هي عباره عن مرايه للي بيحصل جواك…. لو عايز الحياه يبقي شكلها حلو…اتأكد ان المرايه نظيفه!

#منير_الشاذلي

#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual

اضطراب الشخصيه النرجسيه ٢ – اتعامل ازاي مع شخص نرجسي ؟

اضطراب الشخصيه النرجسيه (2) –
اتعامل ازاي مع الشخص النرجسي؟

ردا علي السؤال اللي ناس كتير سألته عن طرق التعامل مع #الشخص_النرجسي
او الشخص المصاب ب “#اضطراب_الشخصيه_النرجسيه”

في البدايه احب اوضح حاجه، و هي أن موضوع أن أي حد مضايقني اسمّيه شخص نرجسي بقي منتشر قوي الايام دي و ناس كتيره بتجيلي و تقوللي أن ابوهم او امهم أو شريك حياتهم “شخص نرجسي و لا يمكن التعامل معاه !”. بس الحقيقه ان معظمنا عندنا جزء و لو صغير من الصفات النرجسيه، لأن من ضمنها صفات حب الذات المتأصلة في كل البشر !. الصفات دي لو زادت كتير و بقي تأثيرها مضر علي الناس يبقي ساعتها ممكن نقول إن الشخص ده عنده اضطراب الشخصيه النرجسيه … إنما مش كل حد مضايقني يبقي شخص نرجسي !.

طيب لو افترضنا أن الشخص فعلا نرجسي، اتعامل معاه ازاي ؟…

1. اول حاجه اني ما افترضش اني مش حينفع امشي!
بخلاف العلاقه مع الأم و الاب، اي علاقه تانيه انا ممكن امشي منها!. حتي علاقات الاخوه، ممكن اخد مساحتي فيها و ابعد شويه عن الشخص لو كان عنده صفات نرجسيه كتير و الصفات دي بتأذيني .
إنما كل العلاقات ممكن امشي منها! لو انا مش مستريح.. او لو حاسس اني “دمي ممصوص” او بيتم استغلالي عاطفيا أو جسديا او ماديا، يبقي احسن حاجه اني امشي .
و حتي لو فيه اولاد، الاولاد احسنلهم يتربوا بين ام و اب منفصلين، و حد فيهم سوي نفسيا، عن أنهم يبقوا بين ام و اب عايشين مع بعض، بس واحد فيهم بيمصّ دم التاني و بيستغله و بيحقّر منه!.
فلو عندك الفرصه انك تمشي من العلاقه مع الشخص المضطرب نرجسيا ..ف ده هو الاختيار المناسب !

2. ماتخليهوش يشيّلَك الغلط!.
واحد من اكتر صفات الشخصيات دي انها دائما بترمي الغلط و تنتقد تصرفات الأشخاص اللي معاها، فماتصدقش كلامهم عنك!. حتي لو انت مضطر تسمع كلامهم و انتقادهم ليك، ما تخدوش انها حقيقه، و اعرف انهم بيحاولوا يسيطروا عليك عن طريق الانتقاد و أنهم يحسسوك انك ضعيف، او غلطان طول الوقت، او أن حكمك علي الأشياء دائما غلط!.

3. ماتسمعش كلامهم و تنفذه!
لو انت في علاقه مع شخص كده، حيبقي دائما عايزك تنفِذ اللي هو (او هي) عايزاه. و طول ما انت بتسمع الكلام حيبقي راضي عنك و راكب فوق راسك.
لما تبطل تسمع الكلام و تنفذ اللي هو بيقوله، حيحطّ عليك ضغط هايل علشان ترجع تسمع الكلام، و لما الضغط ده حيفشل (بعد مده )، حيقرر انك “ماتستاهلش” النعمه اللي انت فيها، و يدوّر علي حد تاني! (طبعا الكلام ده ماينطبقش علي العلاقه مع الام او الاب في المُطلق، و لازم نكون حذرين في أننا نقول إن امي او ابويا شخص نرجسي علشان عندنا مشاكل معاهم!)

4. بطل تصدق وعودهم!.
هم احسن ناس بيوعدوا بحاجات، و بعدين يخلفوها!. و دائما حيكون عندهم مبرراتهم لخلف الوعود دي، و حيرموا الأسباب عليك!.
فبطل تسمع وعودهم، و تقول “اكيد حيتغيروا المره دي!”.
اي احتمالية تغيير ليهم (حتي و لو صغيره) لازم تحصل في اللحظه دي، مش كمان ساعه!.

5. بطّل تقول “اصل هو كان جميل زمان، ماعرفتش اتغير ليه!”
الأشخاص اللي عندهم الاضطراب ده في بداية العلاقه بيكونوا في منتهي الجاذبيه، و بيظهروا اهتمامهم بالشخص التاني بشكل عنيف و مبالغ فيه حتي …. بس ده في بداية العلاقه بس ….(او لو انت عايز تمشي و هو/هي عايزه ترجعك)…
بس الكلام ده مش حيستمر كتير !

6. بطّل تحاول تكون محبوب منهم!
فكرة انك تكون محتاج تتحب او تتقدر من الشخص اللي عنده الاضطراب ده، هي اكتر نقطة ضعف ممكن يدخلّك من خلالها .
لازم تعرف أنه حيحاول يلعب ألعابه عليك و يحسسك بالذنب مره، و بالتقصير مرات… و غالبا حيتكلم عنك وحش و يسوأ سمعتك…. اسمع الكلام من ودن، و طلعه من التانيه! لأنك لو اتأثرت، حيسيطر عليك تاني!.

7. اختار قراراتك بالشكل المناسب ليك!
حتي لو عملوا عليك إسقاط و قالوا إنك اناني، و انك مابتشوفش الا نفسك… فكّر في مصلحتك اولا (و مصلحة اطفالك) ، إنما ماتنجذبش لكلامهم الجميل عن أنهم بيفكروا في مصلحتك ..و ان كل اللي هم بيعملوه ده علشان خاطرك!

8. تجنب انك تكون عدواني (او انك تنتقد كتير ) الشخص اللي عنده الاضطراب ده، لأن عدوانيتك او انتقادك ليه حيواجهه بموجات من الغضب و الانتقاد العنيفه.

9. اتعلم تشوف الحاجات الحلوه اللي فيهم!
مفيش انسان عايز يكون انسان سئ!
كل شخص بيعمل اللي هو شايف أنه صح، و غالبا حيكون ليه مبرراته.
لو انت مضطر تعيش مع حد عنده الاضطراب ده ، لازم تعرف أن الشخص اللي عنده اضطراب نرجسي (زي اي حد) ساعات بيعمل حاجات كويسه، و لما ده يحصل لازم تاخد بالك منها و تشكره عليها و تفكره بيها

10. ماتحاولش تصلّحهم!
لأنك مش حتعرف، و لأن ده مش دورك!….
الكلام بتاع “I can fix him /her” ده مش حينفع معاهم!

11. اتعلم ميديتيشن/تأمل (meditation)
الشخص اللي عنده الاضطراب ده بيبقي زي مايكون بيمتص طاقتك علي طول. لما تتعلم ميديتيشن ، ده حيساعدك ترفع من طاقتك شويه! و ده حيساعدك في التعامل معاه، و كمان حيخليك تشوف فرصك في انك تمشي بشكل احسن!

12. لازم تكون اقوي!
لو انت/انتي مضطره تعيشي مع الشخص اللي عنده الاضطراب ده (او لو حتي عايز تمشي)، غالبا حتحس ان طاقتك ضعيفه جدا و مش قادر تاخد الخطوه دي، و رغم أن تعلم الميديتيشن بيساعد، إلا أن التواصل مع الاهل (و خصوصا الاب او الاخ) و طلب المساعده منهم حيحسسك بالقوه… و ان ليك ظهر… و ده بيساعد كتير في قدرتك علي التعامل مع الموقف ده!
في معظم الاحيان، الشخص المصاب بالاضطراب ده حيمتص طاقتك بالكامل… أستعين بحد!

13. تاني… لو عندك إمكانية انك تمشي من العلاقه، يستحسن انك تمشي! و ماتحاولش تعالجهم!
#منير_الشاذلي

#narcissisticpersonalitydisorder
#narcissist

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual

ازاي اعرف اني بتعامل مع شخص نرجسي؟

ازاي اعرف اني بتعامل مع شخص نرجسي ؟

(اضطراب الشخصيه النرجسيه – ١)

دي شويه ملامح بتظهر دائما في العلاقه مع الاسخاص اللي بيعانوا من النوع ده من الاضطراب:

1. بيبالغ في مشاعره في بداية العلاقة!
ده مش معناه أن كل شخص بيبالغ في مشاعره في بداية العلاقه شخص عنده صفات نرجسيه ، بس معظم الناس اللي عندهم صفات نرجسيه كتيره بيبالغوا جدا في مشاعرهم و اهتمامهم بالشخص التاني في بداية العلاقه! (و بعد كده كله بيتغير)
2. بيحب يتكلم عن نفسه و إنجازاته و يعظّم من نفسه كتير
و علشان كده لو انت في علاقه مع شخص اسأل نفسك ايه اللي هو بيعمله لما بتتكلم عن نفسك ؟ ..هل بيسمع و بيسأل اسئله علشان يعرف اكتر، و لا بيحوِّل الموضوع علي نفسه ؟
3. احتياجهم الدائم لأن الناس تشوفهم و تاخد بالها منهم.
بمعني اخر، من غير ما الناس تتكلم عنهم كويس، او تشوف مميزاتهم، عمرهم ما بيحسوا بالسعاده أو الرضا عن نفسهم!
4. مافيش تعاطف مع الاخرين!
دي اشهر حاجه ، الشخص المصاب بإضطراب الشخصيه النرجسيه، التعاطف  مع الآخرين عنده بصفه عامه قليل جدا (او معدوم في معظم الأحيان )
علشان كده، اسأل نفسك لو كنت في علاقة هل بتهتم بيك او بيكي لما تحكيله علي يوم وحش في الشغل أو لما بتتخانق مع أهلك أو مديرك، ولا بتحس أنه زهق من كلامك ده و مش عايز يسمعك؟
5. دائما حتلاقيه بيتتقدك و بينتقد تصرفاتك (و غالبا بشكل ساخر أو فيه تقليل منك ).
في اول العلاقه بيبقي شخص مجامل و ظريف، بس بعد كده حتلاقي انتقاد ليك، و تصرفاتك و أفكارك علي طول الخط!
6. دائما حيعزلك عن الاهل و الاصدقاء (علشان تبقي ليه لوحده) …و دائما حيقولك انا عايز نبقي لوحدينا دايما، و ان الناس التانيين حاسدينكم علي قصة الحب بتاعتكم، و حيبتدي يذم في أصدقاءك و أهلك و يحاول يبعدك عنهم…بشكل غير مباشر
7. مفيش اصدقاء قريبين!
معظم الأشخاص المصابين بإضطراب الشخصيه النرجسيه، مابيبقاش ليهم اصدقاء قريبين.
ممكن يكون ليهم معارف كتيره، إنما مالهومش اصدقاء كتير. (او خالص ).
و علشان كده بيبقي مستغرب لما الشخص اللي معاه بيبقي عايز يشوف أصدقاؤه أو أهله …لأن المفهوم ده مش موجود عندهم قوي!
8. الشخص المصاب بإضطراب الشخصيه النرجسيه عمره ما بيعرف بالخطأ…خالص !
و علشان كده، مانصحش بأنك تحاول تدخل معاهم في أي نقاش، لأن محاولة إقناعهم بتحمل مسئولية اي حاجه او انهم يعترفوا بأي خطأ هي محاوله مستحيله، و غالبا حتخرج منها و انت طاقتك كلها ممصوصه في الحوار ، أو انك تحس ان المشكله فيك انت مش فيهم هم!
9. عمره ما بيتقبل النقد، و بيهاجمك لو انت عبرت ليه عن وجهة نظرك أنه كان محتاج يتصرف بشكل احسن أو يعمل حاجه مختلفه عن اللي عمله!
10. دائما حيحسسك أن فيك حاجه ناقصه!
– انك بطلت تحبه كفايه
– انك اتغيرت و أنه أتصدم فيك!
– أنه بطّل يثق فيك (بعد ما شاف انك مش أهل للثقه و الكلام ده)
– أن كل مشكله بتحصل بينكم انت السبب فيها
– أن أي تصرف خاطئ هو بيعمله تجاهك، انت اللي كنت السبب فيه (و ان انت اللي خليته يعمل كده!)
و اهم حاجه
11. عايز يبقي دائما مسيطر علي العلاقه! و عايزك دائما تعمل اللي هو شايف أنه صح (و طبعا حينتقدك و يحقّر من آراءك علشان تنفذ اللي هو عايزه!)
12. لو جيت تمشي من العلاقه حيمسك فيك .. و يرجع تاني جميل و ظريف لمدة يوم أو يومين، و بعدين يتغير تاني ، هو مش رجع ظريف تاني علشان هو اتغير، هو عمل كده علشان مش عايزك تمشي و لسه عايز يعاقب أهله من خلالك ( علي مستوي العقل الباطن طبعا )
و بعدين لو جيت تمشي تاني حيرحع تاني ظريف، و لو الموضوع مانفعش  حيهينك و يشتمك انك مش شايف النعمه اللي في ايدك، و لو السكه دي ما نفعتش حيحاول يستجديك و يقولك (كده اهون عليك!)، و بعدين لو مانفعش ..حيشتمك تاني… هو مش حيسيبك تمشي بسهوله!…
و علشان كده …لو دخلت في علاقه مع شخص كده… اهرب بسرعه… لأنك مش حتقدر تساعده و انت في علاقه معاه ..ولا ده دورك !
و بعدين محتاج تشوف ايه اللي خلاك تدخل في النوع ده من العلاقات … علشان مايحصلكش ده تاني!
#منير_الشاذلي

*فيه فيديو انا عامله عن الموضوع ده …
ختلاقوا اللينك في أول تعليق

#اضطراب_الشخصيه_النرجسيه
#الشخصيه_النرجسيه
#النرجسيه
#شخص_نرجسي

#narcissist
#narcissisticpersonalitydisorder

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual

كن جميلا !

مع التغيير الكبير اللي بيحصل في العالم في خلال السنين الاخيره، من كورونا لتغيرات اقتصاديه، لتغيرات اجتماعيه و اقتصاديه عنيفه؛ ناس كتيره بتشتكي من تغيّر اخلاق الناس و تغيّر طباعهم! و ان زمان الدنيا كانت سهله و الناس كانت طيبه، انما دلوقتي الدنيا بقت زي الغابه و ان لازم الواحد مايبقاش طيب علشان “الطيبين بيِتّاكلوا في الزمن ده”…

طب لو كلنا ما بقيناش طيبين و طَلَعنا بس الشر اللي فينا لبعضينا…بنشتكي من اللي بيحصل ليه؟؟

لو عايزين الحياه تتغير …لازم نبدأ بتغيير حياتنا …
و لو نِفسنا ان الناس تبقي طيبه تاني…محتاجين نحتفظ بالطيبه اللي فينا و نعاملهم كويس…
الناس اللي حلوه من جوه، بتشوف الحاجات الحلوه في الدنيا …
و الناس اللي جواها خوف و كره و صراع، بتشوف الحاجات دي كلها في كل حته حواليها …

التغيير عمره ما حييجي من بره… التغيير بيحصل من جوه الأول…من جوانا.

امي الله يرحمها كانت دايما تقوللي جملة ايليا ابو ماضي …..”كن جميلا..تري الوجود جميلا” …

لمّا ننقي قلبنا من الخوف و الغضب و من الكراهيه … حنعرف نشوف الجمال في الدنيا … لأنه علي طول موجود  !
#منير_الشاذلي
#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual

The spiritual fastfood!

الوجبات السريعه الروحانيه !
The “spiritual” fastfood!
—-

واحده من اهم المشاكل الكبيره في العالم دلوقتي في رأيي، هي ثقافة “التيك اواي” …او “الوجبات السريعه” …

الناس كلها عايزه تعمل كل حاجه بسرعه …
توصل للي هي عايزاه بسرعه ، تغتني بسرعه …تتعالج بسرعه … حتي تتطور روحانيا بسرعه …

ناس كتيره بتسألني أسأله من نوعية “انا محتاج كام جلسه علشان اتعالج من مشاكلي النفسيه؟” ، او ” انا محتاج كام شهر علشان ابقي انسان متطور روحانيا ؟” أو “انا دلوقتي في انهي مستوي وعي ، و امتي اوصل للمستويات الاعلي ؟ ” …او حتي “هو انا المفروض اقرأ سورة الكهف كام مره علشان الحزن يمشي من عندي!”….
و ناس كتيره هاريه نفسها كورسات تنميه بشريه أو كوتشينح (coaching) أو هيلينج (healing) …واحد ورا التاني، و كأن فيه سباق و انا محتاج اوصل الأول!

و مع احترامي الكبير لرغبات كل شخص و أن كل واحد *عايز يبقي سعيد بسرعه*  الا ان للأسف الدنيا مش كده…كل حاجه محتاجه تاخد وقتها…
زي ما الست الحامل لو خلِفِت بسرعه ، الطفل حينزل ميت، و زي ما الفاكهه لو اتقطفت بسرعه حتطلع ماسخه و ما تتاكلش! …

طبعا الايجو بتاعنا بيلعب ألعابه كتير و بيصورلنا أننا *محتاجين نوصل هناك دلوقتي* …. بس الحقيقه ان في رحلة التطور بتاعنا سواء كان نفسي او روحاني، اي طريق بنحاول نختصره، مابيوصلناش ….

الفكره مش اني لو اخدت كورسات عمّال علي بطّال ورا بعضها حتخليني اعرف اتطَور اسرع ….
ولا اني لو روحت لأتنين معالجين في نفس الوقت حخف في وقت اقل …
ولا اني لو قريت سورة معينه عشرين مره بدل عشره الموضوع حيتحل في نص الوقت!
للاسف الفكره دي بيتم ترويجها ساعات من خلال الخطابات الدينيه ساعات …و من خلال الكورسات ساعات تانيه … و الناس ابتدت تاخدها اسلوب حياه علشان *مش قادره تستني* !

إنما الحقيقه ان كل حاجه ليها وقتها،  لا حتيجي قبلها…ولا حتيجي بعدها …
و اني لو اكلت ١٠ اطباق مره واحده من غير ما ادي فرصه لمعدتي تهضم كل واحد (حتي لو كان طعمهم حلو)، غالبا حروح المستشفي!.

طريق التطور الروحاني و العلاج النفسي طريق مش سهل …بس ممكن تستمتع بيه لو انت ماشي بالراحه… و الاهم…انك تكون مستعد انك تتألم شويه ..علشان تنظيف اي جرح في الدنيا بيبقي فيه الم في الأول، و كمان لأن الألم هو واحد من أكبر المعلمين الروحانيين لينا في الحياه!

إنما الوصول السريع …اللي من غير الم، ده فكره خياليه…عمرها مابتتحقق…و غالبا الطريق اللي بنمشيه علشان مانتألمش… او بنحاول نختصر نُصّه، بيبقي اكتر طريق مؤلم علي المدي البعيد….

الاختيار ليك!

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual