اضطراب الشخصيه النرجسيه ٢ – اتعامل ازاي مع شخص نرجسي ؟

اضطراب الشخصيه النرجسيه (2) –
اتعامل ازاي مع الشخص النرجسي؟

ردا علي السؤال اللي ناس كتير سألته عن طرق التعامل مع #الشخص_النرجسي
او الشخص المصاب ب “#اضطراب_الشخصيه_النرجسيه”

في البدايه احب اوضح حاجه، و هي أن موضوع أن أي حد مضايقني اسمّيه شخص نرجسي بقي منتشر قوي الايام دي و ناس كتيره بتجيلي و تقوللي أن ابوهم او امهم أو شريك حياتهم “شخص نرجسي و لا يمكن التعامل معاه !”. بس الحقيقه ان معظمنا عندنا جزء و لو صغير من الصفات النرجسيه، لأن من ضمنها صفات حب الذات المتأصلة في كل البشر !. الصفات دي لو زادت كتير و بقي تأثيرها مضر علي الناس يبقي ساعتها ممكن نقول إن الشخص ده عنده اضطراب الشخصيه النرجسيه … إنما مش كل حد مضايقني يبقي شخص نرجسي !.

طيب لو افترضنا أن الشخص فعلا نرجسي، اتعامل معاه ازاي ؟…

1. اول حاجه اني ما افترضش اني مش حينفع امشي!
بخلاف العلاقه مع الأم و الاب، اي علاقه تانيه انا ممكن امشي منها!. حتي علاقات الاخوه، ممكن اخد مساحتي فيها و ابعد شويه عن الشخص لو كان عنده صفات نرجسيه كتير و الصفات دي بتأذيني .
إنما كل العلاقات ممكن امشي منها! لو انا مش مستريح.. او لو حاسس اني “دمي ممصوص” او بيتم استغلالي عاطفيا أو جسديا او ماديا، يبقي احسن حاجه اني امشي .
و حتي لو فيه اولاد، الاولاد احسنلهم يتربوا بين ام و اب منفصلين، و حد فيهم سوي نفسيا، عن أنهم يبقوا بين ام و اب عايشين مع بعض، بس واحد فيهم بيمصّ دم التاني و بيستغله و بيحقّر منه!.
فلو عندك الفرصه انك تمشي من العلاقه مع الشخص المضطرب نرجسيا ..ف ده هو الاختيار المناسب !

2. ماتخليهوش يشيّلَك الغلط!.
واحد من اكتر صفات الشخصيات دي انها دائما بترمي الغلط و تنتقد تصرفات الأشخاص اللي معاها، فماتصدقش كلامهم عنك!. حتي لو انت مضطر تسمع كلامهم و انتقادهم ليك، ما تخدوش انها حقيقه، و اعرف انهم بيحاولوا يسيطروا عليك عن طريق الانتقاد و أنهم يحسسوك انك ضعيف، او غلطان طول الوقت، او أن حكمك علي الأشياء دائما غلط!.

3. ماتسمعش كلامهم و تنفذه!
لو انت في علاقه مع شخص كده، حيبقي دائما عايزك تنفِذ اللي هو (او هي) عايزاه. و طول ما انت بتسمع الكلام حيبقي راضي عنك و راكب فوق راسك.
لما تبطل تسمع الكلام و تنفذ اللي هو بيقوله، حيحطّ عليك ضغط هايل علشان ترجع تسمع الكلام، و لما الضغط ده حيفشل (بعد مده )، حيقرر انك “ماتستاهلش” النعمه اللي انت فيها، و يدوّر علي حد تاني! (طبعا الكلام ده ماينطبقش علي العلاقه مع الام او الاب في المُطلق، و لازم نكون حذرين في أننا نقول إن امي او ابويا شخص نرجسي علشان عندنا مشاكل معاهم!)

4. بطل تصدق وعودهم!.
هم احسن ناس بيوعدوا بحاجات، و بعدين يخلفوها!. و دائما حيكون عندهم مبرراتهم لخلف الوعود دي، و حيرموا الأسباب عليك!.
فبطل تسمع وعودهم، و تقول “اكيد حيتغيروا المره دي!”.
اي احتمالية تغيير ليهم (حتي و لو صغيره) لازم تحصل في اللحظه دي، مش كمان ساعه!.

5. بطّل تقول “اصل هو كان جميل زمان، ماعرفتش اتغير ليه!”
الأشخاص اللي عندهم الاضطراب ده في بداية العلاقه بيكونوا في منتهي الجاذبيه، و بيظهروا اهتمامهم بالشخص التاني بشكل عنيف و مبالغ فيه حتي …. بس ده في بداية العلاقه بس ….(او لو انت عايز تمشي و هو/هي عايزه ترجعك)…
بس الكلام ده مش حيستمر كتير !

6. بطّل تحاول تكون محبوب منهم!
فكرة انك تكون محتاج تتحب او تتقدر من الشخص اللي عنده الاضطراب ده، هي اكتر نقطة ضعف ممكن يدخلّك من خلالها .
لازم تعرف أنه حيحاول يلعب ألعابه عليك و يحسسك بالذنب مره، و بالتقصير مرات… و غالبا حيتكلم عنك وحش و يسوأ سمعتك…. اسمع الكلام من ودن، و طلعه من التانيه! لأنك لو اتأثرت، حيسيطر عليك تاني!.

7. اختار قراراتك بالشكل المناسب ليك!
حتي لو عملوا عليك إسقاط و قالوا إنك اناني، و انك مابتشوفش الا نفسك… فكّر في مصلحتك اولا (و مصلحة اطفالك) ، إنما ماتنجذبش لكلامهم الجميل عن أنهم بيفكروا في مصلحتك ..و ان كل اللي هم بيعملوه ده علشان خاطرك!

8. تجنب انك تكون عدواني (او انك تنتقد كتير ) الشخص اللي عنده الاضطراب ده، لأن عدوانيتك او انتقادك ليه حيواجهه بموجات من الغضب و الانتقاد العنيفه.

9. اتعلم تشوف الحاجات الحلوه اللي فيهم!
مفيش انسان عايز يكون انسان سئ!
كل شخص بيعمل اللي هو شايف أنه صح، و غالبا حيكون ليه مبرراته.
لو انت مضطر تعيش مع حد عنده الاضطراب ده ، لازم تعرف أن الشخص اللي عنده اضطراب نرجسي (زي اي حد) ساعات بيعمل حاجات كويسه، و لما ده يحصل لازم تاخد بالك منها و تشكره عليها و تفكره بيها

10. ماتحاولش تصلّحهم!
لأنك مش حتعرف، و لأن ده مش دورك!….
الكلام بتاع “I can fix him /her” ده مش حينفع معاهم!

11. اتعلم ميديتيشن/تأمل (meditation)
الشخص اللي عنده الاضطراب ده بيبقي زي مايكون بيمتص طاقتك علي طول. لما تتعلم ميديتيشن ، ده حيساعدك ترفع من طاقتك شويه! و ده حيساعدك في التعامل معاه، و كمان حيخليك تشوف فرصك في انك تمشي بشكل احسن!

12. لازم تكون اقوي!
لو انت/انتي مضطره تعيشي مع الشخص اللي عنده الاضطراب ده (او لو حتي عايز تمشي)، غالبا حتحس ان طاقتك ضعيفه جدا و مش قادر تاخد الخطوه دي، و رغم أن تعلم الميديتيشن بيساعد، إلا أن التواصل مع الاهل (و خصوصا الاب او الاخ) و طلب المساعده منهم حيحسسك بالقوه… و ان ليك ظهر… و ده بيساعد كتير في قدرتك علي التعامل مع الموقف ده!
في معظم الاحيان، الشخص المصاب بالاضطراب ده حيمتص طاقتك بالكامل… أستعين بحد!

13. تاني… لو عندك إمكانية انك تمشي من العلاقه، يستحسن انك تمشي! و ماتحاولش تعالجهم!
#منير_الشاذلي

#narcissisticpersonalitydisorder
#narcissist

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual