ماتسامحش أهلك !

ماتسامِحش اهلك!

——

ناس كتير بتتكلم معايا عن الحاجات اللي بكتبها عن اهمية العلاقه بين الواحد و بين امه و ابوه ،و بيسألوني ازاي ممكن الواحد “يسامح اهله”، و ردّي دايما ان “مش المفروض ان الواحد يسامح اهله! “… طبعا الرد ده بيبقي صادم بالنسبه لناس كتير… بس ده رأيي.

لأن اصلا فكرة ان الواحد “يسامح اهله” فيها نوع من انواع التعالي علي الاهل.. و افتراض انك تعرف اكتر منهم و علشان كده ” حتكبّر دماغك و تسامحهم ، علشان ياعيني هما غلابه و مش فاهمين” …. نفس فكرة ان ابنك او بنتك يسامحوك علشان انت زعقتلهم علشان مايحطوش صوابعهم في كُبس الكهربا و هم صغيرين و هما حيسامحوك علشان انت اب او ام طيبه بس مجنون!   

امنا و ابونا جم الدنيا قبلينا  ب ٢٠ او ٣٠ سنه ( او يمكن اكتر)  و مرّوا بتجارب في حياتهم اكتر مننا ب ٢٠ او ٣٠ سنه،  ففكرة اني عارف اكتر منهم في الحياه علشان معايا دكتوراه او علشان سافرت شوية بلاد و هم لأ … أو حتي علشان اشتغلت في مناصب اعلي منهم هي فكرة فيها كتير من الايجو و الشعور بالافضليه الغير مبررة ….
الخبرات الحياتيه الاساسيه في الحياه هي خبرات الموت و الميلاد ..و شوية traumas في النص…و في الكلام ده دائما اهالينا سابقيننا بخطوه …حتي لو عمرهم ماكانوا سابوا القريه اللي هم جايين منها أو طلعوا بره البيت!.

احنا عمرنا ماحنعرف اللي امنا و ابونا مرّوا بيه في صُغرهم كله… و لا ايه اللي عانوه و هم بيربونا لغاية ما كبرنا…. و لو عرفنا.. حتي فكرة اننا نسامحهم حتبان علي انها فكره سخيفه و طفوليه جدا. 

الحقيقه اننا “مابنسامحش” ابونا و امنا.. .احنا “بنتقبلهم زي ما هم…و نتصالح معاهم”…  و نحترم اللي هم ادوهولنا (حتي لو كنا شايفين انه كان مش زي ما احنا عايزين) …. لأن غالبا ده كان اكتر حاجه  ممكن يدوها ( او الطريقه اللي يعرفوها)! 

ده مش معناه اننا نوافق علي تحكمهم في حياتنا (لو احنا كبار و هم لسه بيحاولوا يتحكموا في حياتنا )، أو نوافق علي اي اعتداء جسدي أو لفظي بيحصلّنا منهم ( علي الرغم من أن تعريف الاعتداء ده تعريف مطاط و مش محدد!). انما ده معناه اننا نحاول نفهم الأسلوب ده و الافعال دي جايه منين و ايه اسبابها (اللي غالبا ليها علاقه بطريقه تربيتهم هما) ، و نتعاطف معاهم و نفهم أن معظم أفعالهم جايه من موقع الحب لينا و أنهم كانوا عايزين يشوفونا احسن (حتي لو كان أسلوب التعبير عن الحب ده مش مناسب لينا)

#السلام النفسي في الحياه و مع الاهل ما بيجيش لما نفتكر اننا اكبر منهم… او عارفين اكتر منهم … السلام النفسي بييجي لما ناخد وضعنا الطبيعي قدامهم… لما نبطل ننتقد تصرفاتهم و الحاجات اللي هما ادوهالنا أو مادوهاش… لما نبطل نبقي عايزينهم مثاليين و مابيغلطوش…و نعرف انهم بشر و ممكن يغلطوا أو يعملوا تصرفات بحسن نيه و ماتطلعش مفيده لينا  …. و كمان لما نبطل نحس اننا *مسئولين عن اتخاذ قرارات ليهم* لما بيكبروا علشان يا عيني هما مش فاهمين الحياه دلوقتي عامله ازاي !

لما نعرف اننا “احنا الصغّير..   و هم الكبار”

السلام النفسي بييجي لما قلبنا يكون مفتوح لابونا و امنا!
  
#منير_الشاذلي

#Monir_El_Shazly
( إعادة نشر)

#السلام_النفسي
#العلاقه_مع_الاهل

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual